From Cairo to Berlin, one bug at a time.

Hossam Eldin14 Oct 2026

ممتاز جدا طالما ابتديت تاخد الخطوات و وصلت فيها لشوط كبير وحاببها اكتر و بتذاكر فى وقت فراغك و انت اصلا وصلت لمرحلة ممتازة فى التيستنج فكمل عادى بس ماتنقلش للشغل الجديد الا لما تروح على مكان كويس و مرتبه كويس بحيث مايحصلش اى مشكلة مع التزاماتك لأن ساعتها هتتضايق اكتر من الضيقة اللى عندنا بسبب الوضع الحالى . انك تزود البروفايل بتاعك و الـ skills بتاعتك دى حاجة ممتازة اهم حاجة ماتجيش على شغلك الأساسى ولا لألتزاماتك لحد ما تنقل على وظيفة مستقرة فى مكان كويس و بمرتب كويس حتى لو أقل من الحالى شوية بس طالما انك حاببها أكتر يبقى هتتطور فيها اسرع و هتاخد بعدها مرتب اعلى و ممكن تشوف شغل فرى لانس لو متاح و واحدة واحدة ان شاء الله ربنا هيكرمك انا كنت هقولك فكر فى بيزنس جانبى تشغل فيه فلوسك بحيث تكون مأمن نفسك بس للأسف ممكن ماتبقاش انت متفرع تفرغ كامل ليها وده مش صح و برضه البيزنس مش حاجة سهلة او تقول ان فيه حاجة مضمونة وإلا كانت كل الناس عملتها .. انا نفسى واقع فى الحيرة دى فبحاول ادور على اى وسيلة جنب شغلى استثمر فيه بس تايه ومش لاقى حاجة اقدر اقول انها مضمونة بالتوفيق ليك يارب فى مذاكرتك و خطوتك الجاية و نسمع عنك كل خير يارب

Hossam Eldin14 Oct 2026

مش فارقة كله زى بعضه .. الوضع مش لطيف فى كل المجالات فى اوروبا و الخليج و مصر الشركات لما بتمشى حد او بتفلس مش هتمشى الناس اللى شغالين X و تسيب اللى شغالين Y لأ هى هتمشى عدد عشان الميزانية او هتقفل خالص فهتمشى كله .. ولو هتمشى X النهاردة فمش معناه ان Y تمام خلاص ومش هيحصله حاجة ده كده معناه انهم هيحاولوا يمشوا على خطة و لو مانفعتش بعد كام يوم هيمشوا اللى شغالين Y برضه. والوضع الحالى مش سببه الـ AI لكن الظروف الاقتصادية نفسها فى العالم كله هى السبب الرئيسى و شركات مابقتش قادرة تكمل و بتقفل . الشغلانات الوحيدة اللى اقدر اقولك عليها انها اتاثرت اكتر من غيرها هى شغل الـ mangement بقى هو المعروض اقل عن الشغل اللى كله تكنيكال حاليا . من ٣ سنين شركتى اللى كنت فيها مشت ناس بس التارجت بتاعهم كان عدد معين من الموظفين يمشى و مشى حوالى ٢٥٠ واحد فى كل المجالات و بعدها كل شهر او شهرين يمشوا عدد تانى وهكذا فحتى انا ماكنش حصلى اى حاجة بس الوضع نفسه مابقاش مستقر و ابتديت ادور على شغل لأن خلاص بقى معروف الدور كده كده هيجى . لو انت حابب تعمل شيفت عشان مش حابب التيستنج او فقدت الشغف فيه و وصلت لمرحلة بقيت خلاص بتعمل كل حاجة ومفيش جديد هقولك اه طبعا دوس و دور على حاجة تلاقى فيها نفسك و شغفك واتعلم .. لكن لو بس بتدور على وسيلة تانية تهرب بيها من المودة اللى ماشية فى العالم حاليا فللأسف ده مش صح و كمان هتاخد وقت تتعلم المجال الجديد و هتنافس اللى شغالين و متعلمين فيها بقالهم كتير و لما هتبتدى شغل فيها هتبقى جونيور من تانى فدى برضه ليها حساباتها انا عن نفسى كنت حابب اعمل شيفت للداتا عشان حاسس انى حاببها لكن الوضع برضه مش لطيف فى كله و الالتزامات اللى عندى مش حمل انى اسيب شغلى و اروح شغل تانى اجرب فيه و اضيع ٩ سنين خبرة فى مجالى الحالى . فنصيحتى انك ممكن تتعلم اى حاجة جانبية فى وقت فراغك بحيث ترضى الشعور جواك انك لو حصلك حاجة فى شغلك فمعاك حاجة تانية تقدر تقدم بيها فى الشركات و تنمى مهاراتك فيها بحيث مايجيش على تعلمك لشغلك الاساسى و ماحدش حرفيا عارف الدنيا رايحة على فين قدام كله ماسك فى شغله مابيفكرش يتحرك لحد ما الدنيا تهدى و الوظايف و الشغل يرجع زى الاول

Hossam Eldin13 Oct 2026

انا بقالي ٤ سنين و نص موجود في ألمانيا بالنسبة للعيشة الموضوع يرجع لطبيعة انت كنت عايش إزاي في مصر بس كمجمل هنا مكان حلو جدا المعيشة و أشجع أي حد يسافر أكيد خصوصا لو مدينة كبيرة زي برلين فيها تنوع كبير من كل الجنسيات و هيكون حواليك أماكن كتيرة جدا تلاقي كل اللي بتحتاجه ومتعود عليه زي الأكل الحلال وغيره الخضرة و أماكن الخروج حواليك في كل مكان ليك و للأولاد و سهل تتنقل لدول تانية تزورها في الاجازات - لو لغتك كويسة ان شاء الله هتلاقي شغل هيخليك قادر تعيش كويس و تدفع ايجار و تسافر و تستمتع بوقتك و غيره كتير من المميزات الحقيقة مش هتبقي بتشتغل عشان يادوب تكفي مصاريفك طب ليه قولتلك علي حسب انت كنت عايش إزاي في مصر ؟ عشان لو انت دخلك في مصر كبير و عندك شقتك و عربيتك و البيزنس بتاعك وفي وسط اهلك ممكن اما تيجي هنا مايعجبكش الوضع فالموضوع في الأول و الاخر يعتمد انت دلوقت عايش إزاي و ظروفك ايه في مصر تربية الاولاد ليها تحديات اكيد ودي من ضمن العيوب للمعيشة في اوروبا عموما عشان التعليم و التعود من سن صغير ان كل شئ عادي عكس اللي متربيين عليه و الموضوع ده مش هتحس بيه الا لما الاطفال تدخل المدرسة و يبقوا في سنة ٤ مثلا كده في الحضانة الوضع تقدر تسيطر عليه زي مثلا ان الاطفال وقت النوم بيكونوا كلهم مش لابسين حاجة غير البامبرز و بيدخلوا اوقات ياخدوا دش من غير هدوم و هما سنهم ٣ سنين فهيتربوا ان ده عادي .. وقت المدرسة بيتعلموا اكتر عن المثلية و ان ده طبيعي وللأسف حصل لبعض ناس هنا مصريين اولادهم جه قالولهم بنحب زميلنا و بنتةجت قالت لأمها انا بحب زميلتي وهتجوزها وهسيب البيت وهي اصلا ١١ سنة فبنحاول نعلم الاطفال اكتر عن الدين و نتكلم معاهم و نقربهم اكتر من عاداتنا و ديننا واخلاقنا بس أغلب الناس بتقعد هنا لحد الجنسية وبعدها يروحوا اي دولة تانية فزي ما فيه مميزات فيه عيوب اكيد خصوصا لو عندك اطفال فدي مسئوليتك و هتتحاسب عليها فلازم تاخد بالك منها جدا وانت بتقرر تعيش في دولة أوروبية

Hossam Eldin6 Oct 2026

السفر لألمانيا فى مجال التيك قدامك اكتر من طريق على حسب خبرتك و ظروفك تختار المناسب معاك بس خلينا نلخص الدنيا : 1- ده الحل الافضل انك تدور على الشركات فى ألمانيا و تقدم على الوظايف و تعمل انترفيوهات و تتقبل و تيجى على عقد عمل لأن ده مش هيكلفك غير وقتك فى الانترفيوهات و بس و ساعتها هتيجى و تشتغل و تبتدى هنا و تقبض مرتب من اول شهر شغل ليك. ٢- فيزا دراسة ماستر او انك تيجى فيزا كارت الفرص هتحتاج حساب بنكى مغلق بحوالى ١٣ الف يورو و تيجى هنا تصرف من فلوسك الشخصية ايجار و مصاريف لحد ما تعمل انترفيوهات و تتقبل و طبعا هيبقى عليك ضغط الوقت مع الفيزا وانك محتاج شغل فى مجالك لأن المتاح هيبقى شغل الطلبة اللى ممكن يساعد فى المصاريف بس مش هيبقى عندك وقت كبير تذاكر و تحضر للانترفيوهات فماحدش فينا بيرشحها بالذات كارت الفرص إلا لو انت عندك خبرة كبيرة و مهاراتك ممتازة فاضل بس تلاقى فرصة و مش هتاخد وقت كبير زى واحد سنين خبرته مش كبيرة .. عشان للأسف ناس أصدقاء لينا خلصوا مدة فيزا كارت الفرص و اضطروا يرجعوا مصر عشان مالاقوش فرصة و كانوا بيصرفوا من فلوسهم و هما عندهم مسئوليات عشان كده فيزا كارت الفرص دى فخ نصيحتى من دلوقت اشتغل على انك تاخد خبرة كبيرة فى مصر وتتعلم ألمانى من دلوقت ده هيزود من فرصك أكتر و برضه نصيحتى ليك ماتحكمش على نفسك او تحس انك مقصر لو انت بتقدم و ماحدش بيرد الوضع فى المجال مجنون بقاله فترة فى ألمانيا و كمان فى مصر فالمشكلة مش هتبقى فيك على قد ما الدنيا مجنونة حاليا و ماحدش عارف يتحرك من شركته بسبب الجنون ده ربنا يوفقك و تنور ألمانيا قريب بإذن الله

Hossam Eldin16 Sept 2026

انت ما شاء الله عندك skills حلوة جدا تخليك تبتدى فى اى شركة مرتاح لو محتاج تركز و تتقل مهاراتك اكتر فهو تطبق على مشاريع اتوميشن و تحط على بروفايلك على github المشاريع دى و تبين انك بتستخدم design patterns و تطبق عليها الـ CI / CD لو انت طبقت على كل ده ممكن تجرب تطبقهم مرة بسيلينيوم و مرة ب playwright بما انه مستخدم كتير جدا فى شركات جوه مصر و بره لو عملت كل ده برضه ساعتها تقدر تدوس وانت مطمن فى الـ performance testing و تعمل مشاريع صغيرة به و الاهم انك تخلى github عندك يبين ده و تحط مشاريعك اول بأول عليه

Hossam Eldin16 Sept 2026

الإجابة هتختلف علي حسب انت عندك كام سنة خبرة في المجال و انواع المشاريع اللي اشتغلت عليها وكمان الـ skills بتاعتك بمعني انك وانت لسه فريش اكيد الشركات هتسالك الاسئلة التقليدية اللي هي الفرق بين كذا وكذا او يقولك يعني ايه api يعني ايه database و يشوفوك بتعرف تكتب تيست كيسز و كده ولا لأ لكن لما بتكون عندك خبرة بيسألوك في المشاريع اللي اشتغلت عليها او مشاريع الاتوميشن اللي عملتها و التولز او الـ libraries اللي اتعلمتها وطبقت عليها و يجيب لك مشاكل وشوف طريقة تفكيرك في حلها + أسئلة في البيزنس نفسه اللي بيشتغلوا فيه عشان يشوفوك فاهم فعلا ولو قابلتك مشكلة معينة وانت بتعمل تيست هتعرف تتعامل معاها كويس ولا لأ فمفيش شييت الناس بتنقي منه الاسئلة وهيجيلك منها ..كل ما تكون هبرة او عندك مهارات كتير فالانترفيو بيبقي علي حسب ده زائد نوع الشركة وطبيعة الناس اللي ماسكة الانترفيوز في الشركة نفسها وهكذا بالنسبة انك لو عايز تعرف انك كويس إزاي فالحل اللي كنت بعمله هو اني ادخل انترفيوز حتي لو مش بفكر انقل أصلا عشان اعرف ناقصني ايه او ايه الجديد في السوق او لو انا وقعت في حاجة معينة اخد بالي منها في الانترفيوز اللي بعد كده بعد ما اتعلمها واطبق عليها كويس الانترفيوز بتجيب خبرة حلوة لوحدها أصلا فمعرفش تقدر انت تطبق ده وتدخل انترفيوز كل فترة وكده ولا وقتك هيبقي مشغول او مش فاضي تذاكر